Sêmbahyang Mungkasi Lêladi minangka Prodhiakon

“Aku munjuk atur panuwun ing Pangéran,/ jiwaku surak gambira ing Allahku,/ awit Pangéran ngrênggani aku mawa sandhangan karahayon,/ lan nyingêbi aku mawa jubah kasunyatan...”

Allah, Rama ingkang mahawicak,/ kawula munjuk atur panuwun ing ngarsa Dalêm,/ déné sampun ngêparêngakên kawula ngêmban ayahan minangka prodhiakon,/ lêladi dhatêng umat sutrêsna Dalêm ing Paroki Santo Yusup Baturetno punika./ Brana ingkang nyantosakakên kapitadosan saèstu kawula alami./ Sapunika kawula ngrumaosi/ pranyata makatên wau péranganing margi/ Sampéyan Dalêm nrêsnani,/ mêmangun,/ saha akarya suburing kadiwasan kapitadosan kawula lan brayat kawula./ Kawula sumêdya mungkasi ayahan lêladi mirunggan punika/ lan badhé kasulihan déning sadhèrèk-sadhèrèk kawula sanèsipun./ Kaparênga paring pangampingan, dhuh, Rama,/ amrih sangsaya kathah sadhèrèk kawula/ rila tumanggap dhatêng wisik tuwin timbalan Dalêm,/ ndhêdhêr wijining asih,/ nyêbar èsêming pangajêng-ajêng/ saha mbabar gumêlar ing pakaryan./ Hyang Roh Suci, Risang Pêpadhang,/ paringa nugraha lan pangampingan dhatêng para kadang prodhiakon énggal mangké,/ amrih dadosa paladi ingkang tumanggap dhatêng kawontênaning umat,/ satêmah umat sagêd mêthik woh mabondhotan saking lêladosanipun./ Krana Sang Kristus, Gusti kawula.  

Amin.

Nyêmbahyangakên Prodiakon Paroki

Allah, Rama ingkang  pênuh ing sih,/ kawula munjuk atur panuwun/ krana kêparêng Dalêm nimbali putra-putri Dalêm/ lêladosan minangka prodhiakon paroki./ Krana baptis sarta kasantosan,/ Sampéyan Dalêm ngêparêngakên para prodhiakon/ sêsarêngan umat miwah para uskup, imam dalasan dhiakon/ nampi pandum ing kaimaman Dalêm Sang Kristus./ Panyuwun kawula/ karêntahna Roh Suci Dalêm dhatêng para prodhiakon,/ supados sami  tawêkêl sarta sêtya/ wicaksana tuwin gambira/ salêbêtipun asung lêladi dhatêng umat./ Karana pangrêksa Dalêm/ mugi para prodiakon sabiyantu kaliyan para pamimpining Pasamuwan,/ amrih sumrambahing karsa anggèn Dalêm nucèkakên/ saha anjrahing Injil karahayon Dalêm

  dhatêng umat/  tuwin masarakat sakiwa têngên kawula./ Kaparênga paring nugraha kabêtahaning gêsang dhatêng brayatipun./ Mugi para prodhiakon nêngênakên para papa, miskin, siningkir, lan difabêl/ ing lêladosanipun./ Sarêng kaliyan Ibu Maria, Ratuning Sagung Nugraha/ kawula unjukakên sêmbahyang kawula punika,/ Lantaran Sang Kristus, Gusti kawula. Amin.